Форекс Проп фирм ба Форекс Брокер 2-ын ялгаа: Форекс арилжаа сонирхогчдод

Форекс арилжаа сонирхогчдод зориулсан гарын авлага

Форекс арилжаанд анхлан хөл тавьж буй хүнд хамгийн эхэнд тулгардаг асуултуудын нэг бол “Брокер гэж юу вэ?”, “Проп фирм гэж юу вэ?”, “Аль нь илүү тохиромжтой вэ?” гэх мэт ойлголтын зөрүүтэй асуудлууд байдаг. Эдгээр хоёр байгууллагын зорилго, үүрэг, арилжаачинтай харьцах харилцаа эрс ялгаатай тул аль нэгийг сонгохоос өмнө ойлгомжтой, баттай мэдээлэлтэй байх шаардлагатай.

Брокер гэж юу вэ?

Брокер бол таныг (арилжаачинг) санхүүгийн зах зээлтэй холбож өгдөг зуучлагч байгууллага юм. Та брокерын арилжааны платформд бүртгүүлж, өөрийн хөрөнгөө байршуулан шууд арилжаа хийх боломжтой болдог.

Брокерууд таны өгсөн захиалгыг валютын зах зээл дээр биелүүлдэг бөгөөд та өөрийн мөнгийг ашиглан ханшийн зөрүүнээс ашиг олохыг зорьдог. Өөрөөр хэлбэл, та өөрийн бүх эрсдлийг хүлээж, өөрийн мөнгөөр арилжаа хийнэ. Арилжаанд ашиг гарсан тохиолдолд тэр ашиг 100 хувь танд ногдоно. Харин алдагдал гарвал тэр нь ч мөн адил бүрэн таны хариуцлагад байдаг.

Жишээ нь: Та брокерийн дансанд 1000 ам.доллар байршуулж, EUR/USD валютын хослол дээр 0.1 лот арилжаа хийж байна гэж бодъё. Зах зээлийн хөдөлгөөнөөс хамаарч та 100 долларын ашиг ч олох боломжтой, эсвэл 100 долларын алдагдал ч хүлээж магадгүй. Энэ бүх эрсдэл, үр дүн 100 хувь таны дээр ирдэг.

Брокерын давуу талууд:

• Та арилжаандаа бүрэн хяналттай байна.
• Уян хатан арилжаа хийх боломжтой.
• Ашгийн 100 хувийг өөрөө авна.
• Арилжааны төрөл бүрийн хэрэгсэл, зах зээлийг сонгон арилжаа хийх боломжтой (форекс, хувьцаа, крипто гэх мэт).

Сул талууд:

• Арилжааны туршлага багатай үед их хэмжээний алдагдал хүлээх магадлал өндөр.
• Сэтгэлзүйн дарамт их байдаг (өөрийн мөнгө алдагдаж байгааг харах мэдрэмж).
• Сургалт, дэмжлэг ховор тохиолдолд л өгдөг.

Проп фирм гэж юу вэ?

Проп фирм буюу proprietary trading firm нь өөрийн мөнгөөр туршлагатай арилжаачдыг ажиллуулж, зах зээл дээр ашиг олох зорилготой байгууллага юм. Эдгээр фирмүүд арилжаачдаас тодорхой шалгалт (evaluation) авч, тэнцсэн хүмүүст өөрийн хөрөнгийг удирдуулах эрх олгодог. Ингэснээр арилжаачин өөрийн мөнгөө эрсдэлд оруулахгүйгээр их хэмжээний хөрөнгөөр арилжаа хийж, олсон ашгаасаа хувь хүртэх боломжтой болдог.

Жишээ нь: Та нэг проп фирмийн сорилтод оролцож, тэдний тавьсан нөхцөлийг биелүүллээ гэж бодъё. Тэд танд 50,000 ам.долларын хөрөнгөтэй арилжааны данс олгож байна. Хэрэв та сард 5,000 долларын ашиг гаргавал фирмийн бодлогоос хамааран та тэр ашгийн 70 хувийг буюу 3,500 долларыг авах боломжтой.

Проп фирмийн давуу талууд:

• Өөрийн мөнгө эрсдэлд орохгүй.
• Том хэмжээний хөрөнгөөр арилжаа хийх боломжтой (зарим фирм 100,000 ам.доллар, түүнээс дээш дүн санал болгодог).
• Ашигтай арилжаа хийж чадвал, тогтмол орлого олох боломжтой.
• Зарим фирмүүд арилжаачдаа сургалтаар дэмждэг, менторшип санал болгодог.
• Мэргэжлийн төвшинд ажиллаж, бодит карьер хөгжүүлэх боломж нээгдэнэ.

Сул талууд:

• Сорилт давж, дүрэм журам мөрдөх шаардлагатай.
• Арилжааны эрсдэлийн хязгаар (дээд лимит, нийт алдагдлын дээд хязгаар) тавигддаг.
• Ашгийн тодорхой хувийг фирмд өгдөг (ихэнхдээ 10–30 хувийг).
• Зарим проп фирмүүд хэт хатуу нөхцөлтэй, шударга бус шалгалт явуулдаг байж болзошгүй (боломжийн, нэр хүндтэй проп фирм сонгох хэрэгтэй).

Проп фирм ба брокерийн гол ялгаа

Проп фирм болон брокер хоёрын гол ялгаа нь хөрөнгийн эх үүсвэр, эрсдэл хүлээх бүтэц, ашиг хуваарилах аргачлал дээр илэрдэг.

Брокерын арилжаанд таны мөнгө хөндлөнгөөс хамааралгүйгээр арилжаалагдана. Харин проп фирмд бол та бусдын хөрөнгөөр арилжаа хийж, тодорхой дүрмийн хүрээнд ашиг хуваалцдаг. Нэг нь илүү чөлөөтэй, гэхдээ эрсдэлтэй; нөгөө нь хязгаарлалттай, гэхдээ хамгаалагдсан орчинд арилжаа хийх боломж олгодог.

Аль нь танд илүү тохирох вэ?

Хувь хүний нөхцөл байдлаас шалтгаална. Хэрэв та:

• Арилжааны туршлага багатай
• Өөрийн мөнгөө эрсдэлд оруулах хүсэлгүй
• Суралцаж, туршлага хуримтлуулах сонирхолтой бол

Проп фирм таны хувьд илүү тохиромжтой байж болно. Тэд танд хэрэгтэй хөрөнгө, хяналттай орчин, суралцах боломжийг олгоно.

Харин та:

• Арилжааны тодорхой туршлагатай
• Стратегидаа итгэлтэй
• Бие дааж шийдвэр гаргах дуртай бол

Брокерт арилжаа хийх нь илүү ашигтай байж болох юм. Та ашгийн 100 хувийг өөрөө авна, хязгаарлалт бага тул илүү уян хатан ажиллаж чадна.

Форекс арилжаа бол өндөр боломж, өндөр эрсдэл бүхий салбар. Арилжаанд амжилт гаргахын тулд зөвхөн техник, стратеги мэдэхээс гадна өөрийн нөхцөл байдалд тохирсон арга замыг сонгох нь хамгийн чухал. Проп фирм ба брокер хоёрын ялгааг сайтар ойлгож, аль нь таны зорилго, эрсдэлийн хүлцэлтэй нийцэж байгааг бодитоор үнэлэх хэрэгтэй. Мөн аль ч тохиолдолд хөнгөн хуумгай шийдвэр гаргахгүй байх, судалгаа хийж, найдвартай байгууллагуудтай хамтрахыг зөвлөж байна.